يا تري فاكر اللحظات الغير عاديه اللي مرت بحياتك؟
يوم تخرجك، يوم جوازك، يوم ما بقيت اب، يوم ماشفت فيلم اللمبي لآول مرة
يا تري ايه اللي خلا اللحظات ده مختلفه؟
مش برضه احساسك بيها.
يعني فيه ناس احساسها تقيل شويه بتعدي بيها لحظات زي ده و عادي، كل عادي، مابتفرقش معاها.
و برضه يعني فيه ناس تانيه ممكن تشاركك اللحظات ده (تحضر معاك حفل التخرج او تحضر فرحك) بس بالنسبه لها ده تعتبر لحظه عاديه برضه، عادي برضه، ماتفرقش كتير. الناس ده بتشاركك اللحظات ده ماديا مش وجدانيا.
سؤال مهم: انتا حتكتب ايه؟
١. حبة مواقف يا اما حصلتي بجد يا اما تخيلتها
و الهدف من الموقف ان كل تفصيله فيه تساهم، و بطريقه غير مباشرة، في نقل احساس معين للقارئ
و المفروض في اللغه اللي حكتب بيها انها تكون عالميه يعني مثلا مش كل الناس شافت فيم اللمبي ده
٢. حبة حاجات تانيه عجبتني شخصيا و حاسس انها مش عاديه.
سؤال برضه مهم: انتا بتكتب ليه؟
و الإجابة هيا:
١. علشان الواحد يحافظ علي احساسه. بالظبط زي العضلات لو الواحد محركهاش حتضعف و المفاصل اللي بتخشن لو متحركتش و الدماغ اللي بتصدي لو مفكرتش. كمان الاحساس بيتبلد لو ما اتعبرش عنه او بتعبير ادق لو مالقيتش حد يشاركك فيه وجدانيا.
٢. علشان بيتهيآلي ان الإحساس معدي. يعني لما تتعامل مع بشر عندها احساس مرهف و تشاركهم وجدانيا فانتا اكيد حتتآثر بيها و يبقي احساسك ارهف و ارهف.
٣. علشان الواحد يزود عدد البشر اللي بيشاركوه وجدانيا.
٤. علشان الواحد يفهم نفسه و البني ادمين التانيين احسن.
قبل ما نختم البوست ده، عندك حاجه تانيه تقولها؟
اه عندي:
فيه طرق كتيره الناس بتعبر بيها عن احساسها غير الكتابه زي الغنا و المزيكا و الرسم و التصوير و النحت و السينيما و الرقص و الكلام طبعا.
ملحوظه صغيره: انا لا انا متجوز ولا انا اب
No comments:
Post a Comment